Suurdeegkaneelrolletjies

Buiten vir brood, is hierdie een van my gunsteling suurdeegresepte! Heerlik as 'n Sondagoggend-na-kerk-bederfie of sommer net enige tyd van die dag. Dit vat 'n rukkie vir die deeg om te rys, so beplan mooi vooruit.

Bestanddele:

Soetdeeg:

• 2 eetlepels/ 30g gesmelte botter of hoëvet margarien
• 2/3 koppie/ 160g melk of wei
• 100g aktiewe suurdeeg
• 1 eier
• 2 eetlepels suiker
• 2.5 koppies koekmeel
• 1 teelepel sout
• kaneelsuiker en gesmelte botter/margarien vir die vulsel

Versiersel (meet met jou hart):

• 2 eetlepels botter/margarien
• +/- 2 koppies maaskaas
• +/- 2 koppies versiersuiker
• genoeg vanieljegeursel

Metode:

1. Smelt jou botter/ margarien, voeg die melk/wei by en laat afkoel.
   
2. Meng die aktiewe suurdeeg, suiker en eier saam in 'n bak tot goed gekombineer.
3. Voeg die afgekoelde bottermengsel by die suurdeegmengsel en gee dit 'n goeie roer.
4. Meng die koekmeel en sout goed saam by die mengsel en knie die deeg tot 'n stywe balletjie vorm.
5. Plaas die deeg in 'n skoon bak, bedek met 'n nat vadoek of stortkappie en los om te rys. Die deeg moet verdubbel in volume.
6. Spuit jou werksoppervlak met kleefwerende sproei en strooi klein bietjie meel. Keer jou deeg daarop uit.
7. Druk jou plat in 'n reghoekige vorm en los vir so 'n paar minute om te rus.
8. Rol die deeg dun uit in 'n reghoekige vorm.
9. Smelt +/- 2 eetlepels botter/margarien en verf dit oor die deeg.
10. Strooi kaneelsuiker in 'n lekker dik laag oor die deeg.
11. Rol jou deeg lekker styf om en druk die deeg bietjie plat na elke rol.
12. Verdeel jou rol in ewe groot dele en sny met 'n deegskraper of skerp mes.
13. Verpak die rolletjies in 'n gesmeerde koekpan en laat verder rys vir so 'n uur.
14. Bak die rolletjies in 'n 180°C voorverhitte oond vir 35-40 minute.
15. Berei die versiersel voor (klits al die bestanddele saam tot sag en romerig - gooi nog bestanddele by tot jy die smaak en tekstuur van jou voorkeur gekry het).
16. Smeer die versiersel oor die afgekoelde rolletjies en geniet!